87 - Al-A'laa
Fulte Racmattaay, Guné Racmatta- le Yallih Migaaqal Qimbisa
(1) 1. Ku Rabbiy kaxxa fayya leh migaq saytunnos!.
(2) 2. Yallay ginoona gineeh massoyséh migaqa.
(3) 3. Kaadu Kaay tu isih elle faxxa hee innal caggudusey gino tirri hee tet celtaah teetik faxximtaamah.
(4) 4. Kaadu Kaay anxax qayso baaxok yeyyeeqeh.
(5) 5. Tohuk wadir kafteeh data ruma tet abe.
(6) 6. Nabiyow ama qhuraan koo akriyisennooh, inkinnah kaa mahawwenta.
(7) 7. Yalli faxem akke waytek, diggah usuk tambulleem kee qellittam yaaxigeh.(maxcoo kee taamak).
(8) 8. Kaadu maqaanê gita koh xabbacoysenno.
(9) 9. Tokkel Nabiyow isi mara Kassis! kassis tu-xiqek.
(10) 10. Yallak meesitah yan num kassite lek.(moomintu kinnuk).
(11) 11. Kaadu gibdi umeyni kassitik axxeere-lek.(korosta kinnuk).
(12) 12. Каау kaxxa girâ cula.
(13) 13. Tohuk lakal usuk tet addal marabaay, mayanuwwa.
(14) 14. Nummah isi nafsi dambik say tunnoy se num naggooweh.
(15) 15. Kaadu isi Rabbih migaq cuseeh kaa inkittoyseeh, wonnaluk salaate num.
(16) 16. Wonna hinnay isin addunyâ mano muxxussan akeerak.
(17) 17. Akeera mano tayseeh, raqtaah waartah.
(18) 18. Diggah tama sin kassisnem naharsi kitoobal tan.
(19) 19. Toh Nabii Ibraahim kee Nabii Muusal obte kitooba.