|
| | CHITSAUKO MARYAM |  |
| | | كاتب الموضوع | رسالة |
|---|
أحمد محمد لبن Ahmad.M.Lbn
مؤسس ومدير المنتدى
عدد المساهمات : 52644
العمر : 72
| | موضوع: CHITSAUKO MARYAM الخميس 24 مارس 2022, 3:24 pm | |
| CHITSAUKO MARYAM
(MARIYA) 19
Muzita raAllah, Vane Tsitsi, Vane Ngoni.
1. Kaaf – Haa – Yaa – Ain – Swaad. (Aya mashoko ndemamwe ezvishamiso zviri muQur’aan, uye hakuna kana ani zvake anoziva zvaanoreva kunze kwaAllah).
2. (Iyi ndiyo) bufuro (ziviso) yetsitsi dzaTenzi vako kune muranda wavo Zakariyya (Zakero).
3. Apo paakadaidzira kuna Tenzi vake (Allah) daidziro yakavanda.
4. Akataura achiti: “Tenzi vangu (Allah)! Zvirokwazvo, mapfupa angu ava anoregwedeka (apera simba), uye pfupfu yave inopararira musoro (imvi dzapararira musoro), uye handina kumbobvira ndaomera kukukumbirai (muminamato yangu), Tenzi vangu (Allah)!”
5. “Uye zvirokwazvo, ndinotya hama dzangu mushure mangu, uye mukadzi wangu ingomwa (haana mbereko). Naizvozvo (ndinokumbirawo) mundipewo mugari wenhaka (yangu) kubva kwamuri.”
6. “(Uyo) achandigara nhaka, uye achazogara nhaka (Ruzivo nehuporofita kwete mari) kubva mumhuri yaYa’qoob (Jakobho). Uye ivai munoita kuti (mwana uyu wandiri kukukumbirai) ave anokufadzai, (imi) Tenzi vangu!”
7. (Allah vakati): “Iwe Zakariyya (Zakero)! Zvirokwazvo, tirikukupa mashoko anofadza emwanakomana, zita rake ndiYahya (Johwani). Hatisati tambopa zita iri kunani-nani zvake kubvira makare.”
8. (Zakero) akati: “Tenzi vangu! Zvirokwazvo, ndingaite mwanakomana seiko apo mudzimai wangu ingomwa (haana mbereko), uye ndave mukweguri (akurisa)?”
9. (Allah) ndokuti: “Nokudaro (zvichaitika). Tenzi vako (Allah) vanoti: Zvirinyore kwandiri. Uye (iwe Zakero) ndakave ndinokusika mushure apo pawakanga usiri chinhu!”
10. Zakariyya (Zakero) akave anoti: “Tenzi vangu! Nditaridzeiwo chiratidzo.” Ndokubva (Allah) vati: “Chiratidzo chako ndechekuti uchave unoregedza kutaura nevanhu kwehusiku hutatu, nyangwe hazvo pasina chinokanganisa muviri.”
11. Pedzezvo (Zakariyya) akabuda munzvimbo yokunamatira (Al-Mihraab) akava anovaudza (kuburikidza) nezviratidzo kuti vave vanorumbidza Allah mangwanani pamwe nemasikati.
12. (Zvakanzi kumwana wake): “Iwe Yahya (Johwani)! Iva unobatisisa (unotora) Gwaro (Torah) zvine simba (zvakasimba).” Uye takava tinomupa njere dzakarurama achiri mwana.
13. Uye takava tinomuita kuti ave munhu anerudo nevamwe (anonzwisisa) setsitsi kubva kwatiri, uye takava tinomuchenura kubva muzvivi (iye Johwani), uye aive munhu akarurama (anotya Allah).
14. Uye akanga ari munhu anopa vabereki vake kodzero dzavo, zvekare akanga asiri munhu anozvitutumadza pamwe nekusateerera (ivo Allah nevabereki vake).
15. Uye runyararo ngaruve kwaari (kubva) zuva raakaberekwa, uye zuva iro raachashaya, pamwe nezuva iro raachamutswa kubva kuvafi!
16. Uye taura (Muhammad (SAW)) zviri muBhuku (Qur’aan maererano nenyaya ya) Maryam (Mariya), apo paakaenda ari oga achisiya mhuri yake kunzvimbo yakatarisana nekumabvazuva.
17. Naizvozvo akazvivharidzira kubva kwavari (kuti asaonekwa), ndokubva tamutumira Rooh yedu (Ngirozi Jibreel (Gabriel)) kwaari (Mariya), naizvozvo (Ngirozi Gabriel) yakatora mufananidzo
wemunhu chaiye sezvaari.
18. (Mariya) akati: “Zvirokwazvo, ndinokumbira kudzivirirwa neane ngoni (naAllah) kubva kwauri, ndokunge kana uchitya Allah.”
19 (Ngirozi) yakati: “Zvirokwazvo, ndiri mutumwa waTenzi vako, (ndirikuda kukuudza nezvefundaidzo) ndichifundaidza chipo pauri chemwanakomana akarurama.”
20. (Maryam) ndokuti: “Ndingagoita mwanakomana seiko, apo hapana kana munhurume akambondibata, uye handisi pfambi?”
21. (Ngirozi) yakati: “Nokudaro (zvichaitika). Tenzi vako vati: ‘Zvirinyore kwandiri (ini Allah). Uye tichamuita kuti ave chiratidzo kuvanhu uye setsitsi kubva kwatiri (Allah) zvekare, uye chiitiko chine chisungo kubva kuna Allah.’”
22. Naizvozvo (Mariya) akave anozvitakura naye, pedzezvo ndokubva aenda naye kunzvimbo iri kure (kumupata weBethlehem uri mamaera 4 – 6 kubva muJerusarema).
23. Naizvozvo marwadzo ekuzvara (pfumbo) akamutsveta pahunde yemuti wemadheti (michero inoita kunge nyii asi ikuru uye ichitapira zvikuru). (Mariya) ndokuti: “Ndakungura hangu ini, ndingadai ndakafa hangu ndisati ndawana izvi, uye ndakatokanganikwa ndisingaonekwi hangu!”
24. Pedzezvo (mwanakomana Isa (Jesu) kana kuti Ngirozi Gabriel) akave anodaidzira (akachema) kuzasi kwaMariya achiti: “Usasuruvare hako. Tenzi vako vave vanokuisira rwizi pasi pako.”
25. “Uye zunguza hunde yemuti wemadheti (michero yakafanana nenyii asi ikuru uye ichitapira zvikuru), uchaita kuti madheti akaibva adonhere kwauri.”
26. “Nekudaro, idya wonwa uye wofara. Kana uchinge waona munhu upi zvake, iti (kwaari): ‘Zvirokwazvo, ndapa chivimbiso chekutsanya kune ane nyasha zhinji (Allah). Naizvozvo, handisi kutozotaura nani zvake zuva rino.’”
27. Saka (Mariya) akauya naye (mwana wake) kuvanhu vake akamutakura. Vakabva vati: “Iwe Mariya! Zvechokwadi wauya nechinhu chikuru kwazvo.”
28. “Iwe hanzvadzi yaHaaroon (Aroni)! Baba vako vakanga vasingaite hupombwe, uye amai vako (chaivo) vakanga vasiri pfambi.”
29. (Mariya) akabva anongedzera kwaari (kacheche Isa (AS)). (Vanhu) vakati: “Tingataure sei nemwana achiri mumbereko (achiri kacheche)?”
30. (Iko kacheche Isa (AS) kakataura) kakati: “Zvirokwazvo, ndiri muranda waAllah. (Allah) vandipa Gwaro (Vhangeri) uye vakandiita muporofita (wavo).”
31. “Uye (Allah) vandiita kuti ndive ndakakomborerwa pose pandiri, zvakare vandikurudzira kuita Swalaah (Munamato), nekupa Zakaah (Zvipo kuvarombo) kana ndichingori mupenyu.”
32. “Uye (Allah) vandiita kuti ndive ndinoteerera amai vangu, uye ndisave mutadzi anozvitutumadza.”
33. “Zvekare runyararo ngaruve pandiri (kubva) zuva randakazvarwa, uye zuva randichafa, uye nezuva randichamutswa kubva kuvafi ndova mupenyu!”
34. Uyu ndiIsa (Jesu) mwanakomana waMariya. Iri ishoko rechokwadi pane izvo zvavasina kutendeseka mazviri.
35. Hazviite muhumambo hwaAllah kuti vave nemwanakomana (Iri iguhwa remaKristu ravanopomera Allah, vachireva kuti Jesu mwanakomana waAllah. (Allah) ngavarumbidzwe (nokusingaperi) nekukudzwa (pamusoro peizvo zvavanomusaganidza nazvo). Kana vachinge vapa chisungo pachinhu, vanongoti: “Ngachivepo!” Chinobva chavepo.
36. (Jesu akati): “Uye zvirokwazvo, Allah ndivo Tenzi vangu uye Tenzi venyu (imi vanhu vose). Saka vanamatei (vari voga). Iyi ndiyo nzira yakatwasuka (Islaam yavakakomekedza kuvatumwa vese).
37. Zvino mapato akawanda akapatsanurana (maKristu nenyaya yaJesu), nekudaro matambudziko ngaave kune avo vasingatendi (avo vanopa huchapupu hwekunyepa vachiti Jesu mwana waAllah) kubva mukusangana pazuva guru (musi wekumutswa apo pavachakandwa mumarimi emoto unopisa kwazvo).
38. (Avo vasingatendi mandiri ini Allah) vachanzwa nekuona sei pazuva iro ravachauya kwatiri (paQiyaamah)! Asi avo vanoita mabasa akashata muzuva ranhasi vari mukurasika kuri pachena.
39. Uye vayambire (iwe Muhammad (SAW)) maererano nezvezuva rekusuruvara nekudemba, apo chisungo kana chichinge charongwa, apo vanenge vakatovarairwa (zvavo), apo vasingatombotendi.
40. Zvirokwazvo, tichave tinogara nhaka nyika nechose chiri (panyika) pamusoro payo. Uye kwatiri vose vachava vanodzorerwa.
41. Uye dura muBhuku (Qur’aan) nezvaIbrahim (Abrahamu). Zvirokwazvo, aive murume wechokwadi ari muporofita.
42. Paakati kuna baba vake: “Imi baba vangu! Munonamatirei izvo (zvimudhori) zvisinganzwi, uye zvisingaoni, neizvo zvisingakwanisi kukubatsirai nenzira ipi?”
43. “Imi baba vangu! Zvirokwazvo, pane ruzivo rwauya kwandiri urwo rwusina kuuya kwamuri.
Naizvozvo nditeverei, ndichakutungamirirai kugwara rakatwasuka.”
44. “Imi baba vangu! Musanamate Satani. Zvirokwazvo, Shaitwaan (Satani) kuna (Allah) avo vane nyasha zhinji, akanga ari honzakureva (akawungumara) akaramba kuteerera.”
45. “Imi baba vangu! Zvirokwazvo, ndinotya kuti zvimwe murango kubva kune vane nyasha zhinji (Allah) ungangokubatai (kukuchapurai), izvo zvinozoita kuti muve shamwari yaShaitwaan (Satani) (mumoto weGehena).”
46. (Baba vaAbrahamu Azaru) vakabva vati: “Uri kuramba anamwari vangu here, nhai (iwe) Ibrahim (Abrahamu)? (Iwe Ibrahim) ukasamira kuita izvi (ukaramba uchindiparidzira uchiramba anamwari vangu), zvirokwazvo ndichakutema (nematombo). Uye chibva pandiri (izvezvi) uchindisiya ndiri murunyararo (ndisati ndakuranga).”
47. (Iye Abrahamu) ndokuti: “Runyararo ngaruve kwamuri (baba vangu)! Ndichakukumbirirai ruregerero kuna Tenzi vangu (Allah). Zvirokwazvo, (Allah) vane ngoni zhinji kwandiri.”
48. (Abrahamu akaenderera mberi akati): “Ndichashozhonoka (kutarisa rimwe divi kusiri kwamuri baba vangu) kubva kwamuri uye kubva kune izvo zvamunoteketera kunze kwaAllah. Uye (ndichashevedzera) ndichateketera kuna Tenzi vangu (Allah) zvimwe ndingasave mutadzi mukuteketera Tenzi vangu.”
49. Apo (Abrahamu) paakazoshozhonoka (kutarisa rimwe divi achivasiya) kubva kwavari pamwe neizvo zvavainamata kunze kwaAllah, takamupa Ishaaq (Isaka) naYa’qoob (Jakobho), uye mumwe nemumwe (pakati pavo) takamuita muporofita.
50. Takavapa kubva mutsitsi dzedu (isu Allah – kuratidza hukuru nemasimba avo Allah), (zvinhu zvakanaka), uye takaita kuti (vave) nendimi dzine chokwadi nekuemurika (zvinoreva kuti vanhu vazhinji vanovaremekedza nekuvarumbidza pose panoshevedzerwa mazita avo). |
| | | | أحمد محمد لبن Ahmad.M.Lbn
مؤسس ومدير المنتدى
عدد المساهمات : 52644
العمر : 72
| | موضوع: رد: CHITSAUKO MARYAM الخميس 24 مارس 2022, 3:25 pm | |
| 51. Uye taura muBhuku (Qur’aan rino) nezvaMusa. Zvirokwazvo, akange akasarudzwa, uye ari mutumwa ari muporofita.
52. Zvekare takamushevedza kubva kudivi rerudyi rwegomo, uye takamuswededza pedyo nesu kuti tigoita hurukuro naye (Musa).
53. Uye takamupa munin’ina wake Haaroon (Aroni semutsigiri) (zvakare) ainge ari muporofita, kuburikidza nenyasha dzedu.
54. Taurazve muBhuku (Qur’aan rino) nezva Ismail (Ishumaeri). Zvirokwazvo, akange ane chokwadi mune (zvose) zvaaivimbisa, uye akanga ari mutumwa (uye) ari muporofita.
55. Uye aikurudzira mhuri yake (nevanhu vose) (vake) kuita Swalaah (Munamato), uye kupa Zakaah (Zvipo kuvarombo), uye Tenzi vake vakafadzwa naye.
56. Uye taura muBhuku (Qur’aan rino) nezvaIdrees (Inoki). Zvirokwazvo, aiva munhu (aifarira nokuita zvinhu) zvechokwadi (uye) ari muporofita.
57. Takamukwidziridzazve (kusvika) pachinzvimbo chakakwirira.
58 Kubva pavaporofita (vaAllah) vari pakati pevana vaAdam (AS) ndivavo vakapihwa mutsa naAllah, zvekare kubva pakati pavo ndopane vatakatakura (mungarava) naNooh (Nowa), uye kubva pavana vaAbrahamu naIzirairi, uye kubva pane avo vatakatungamirira nekusarudza (kubva pakati pavo). Apo ndima dzavane nyasha zhinji (Allah) padzaiverengwa kwavari, vaipunzikira pasi vogwadaira vachichema (kuna Allah).
59. Pedzezvo, mushure mavo makauya vatsivi vakanga vachisiya Swalaah (Munamato) uye vaitevedzera zvido zvemoyo. Naizvozvo vachakandwa muGehena.
60. Kusara kweavo vanokumbira ruregerero (kuna Allah) uye vanotenda (muna Allah), voita izvo zvakanaka. Naizvozvo ivavo vachapinda Paradhiso zvekare havambodzvanyirirwi kana nechii zvacho.
61. (Vachapinda mu) mapindu eEden (Paradhiso) ayo akatsiidzwa nevane nyasha zhinji (Allah) kune varanda vavo muzvisingaonekwi. Zvirokwazvo, chitsiidzo chavo (Allah) chichauya (muzvokwadi).
62. Hapana chavachanzwamo (muJannah) chingave Laghw (tsvina, mashoko akaipa, makuhwa, manyepo) kunze kwerunyararo (Kwaziso yerunyararo). Zvekare vachave nekudya makuseni nemasikati.
63. Ndiroro Paradhsio ratichapa kubva kuvaranda vedu senhaka uyo aititya (isu Allah – kuratidza hukuru nemasimba avo Allah).
64. Uye isu (ngirozi) hatiburuke (kubva kumatenga tichiuya pasi) tisina chisungo chaTenzi vako (iwe Muhammad (SAW)). Zvose zviri pamberi pedu, shure kwedu nezviri pakati peizvozvo (pezviviri-mberi neshure) ndezva Allah (nyika yose nekumatenga kose ndekwaAllah); zvekare Tenzi vako (Allah) havana hanganwa (havakanganwi).
65. Tenzi vematenga nenyika nezvose zviri pakati pazvo (penyika nematenga). Naizvozvo vanamate (Allah) (iwe Muhammad (SAW)) uye wova unotsungirira mukuvanamata. Pane waunoziva here akafana navo (Allah)? (Zvirokwazvo hakuna akatombofanana navo, ndivo vega Allah vane chimiro chavo voga, vane masimba pamusoro pezvose).
66. Uyezve munhu (asingatendi) anoti: “Kana ndikafa ndichazove ndinomutswa kuhupenyu zvekare here ini?”
67. Munhu haarangarirewo here kuti takamusika muzvirokwazvo mushure apo akanga asiri chinhu.
68. Naizvozvo ndinopika naTenzi vako, zvirokwazvo, tichave tinovaunganidza pamwe nemaShayaatween (vanasatani), pedzezvo tichavaunza vakakomberedza Jahannam (Gehena) vakagwadama nemabvi.
69. Pedzezvo, zvirokwazvo, tichazvuzvurudza avo vainyanya kupikisa (Allah) vane ngoni kubva mubato roga roga.
70. Pedzezvo, zvirokwazvo, tinonyatsovazivisisa avo vanonyatsokodzera kupiswamo (nemoto muGehena).
71. Uye hakuna kana ani zvake pakati penyu, asi kutoti achadarika pamusoro paro (Gehena). Ichi ndicho chisungo chakatorongwa naTenzi vako (Allah) (chinofanira kuitika).
72. Pedzezvo, tichave tinodzivirira avo vaitya (Allah). Uye tichasiyamo avo vanoita mabasa asakarurama vakagwadama nemabvi avo.
73. Uye kana ndima dzedu dziri pachena (maAayaat) dzikaverengwa kwavari avo vasingatendi (vapfumi vakarasika pamaQuraish), vanoti kune vanotenda (varombo pavateedzeri vamutumwa Muhammad (SAW)): “Nderipi pamapato maviri aya (revatendi nevasingatendi) ririnani pachinzvimbo uye rakanakisisa pachiteshi (nzvimbo yekupana mazano)?”
74. Uye zvizvarwa zvingani zvatakaparadza ivo vasati vavepo, avo vaive nani pahupfumi uye vachitaridzika zvakanaka?
75. Iti (iwe Muhammad (SAW)): “Uyo akarasika, (Allah) vane ngoni zhinji vachamusvitsira (tambo-gwara rakatwasuka) kwaari kusvikira vaona izvo zvavakavimbiswa, murango kana nguva (yezuva rekumutswa), naizvozvo vachazoziva havo kuti ndiani akaipa pachinzvimbo, uye ndiani akarebwedeka (asina kusimba) kupinda mumwe panyaya dzemauto.” (Iyi ndiyo mhinduro kumubvunzo uri muQur’aan 19:73)
76. Allah vachave vanowedzera nhungamiro kune avo vakatungamirirwa. Uye mabasa akanaka anogara (kwenguva refu) ari nani kuna Tenzi vako pamakomborero uye ari nani kutozambira nawo (kuramba uinawo uchimaita).
77. Naizvozvo wakambomuonawo here uyo akaramba kutenda mundima dzedu (Qur’aan rino) uye ndokuti: “Zvirokwazvo, ndichagachidzwa hupfumi nevana (kana ndikapihwa hupenyu zvekare)?”
78. Asi anoziva zvakavandika here kana kuti akatora chitenderano kubva kune vane ngoni zhinji (Allah)?
79. Kwete! Tichanyora (pasi zvose) izvo zvaanotaura, uye tichawedzera murango wake chaizvo (mumoto weGehena).
80. Tichagara nhaka (zvose) zvaanotaura (panguva yake yokufa vangave vana kana hupfumi hwatakamupa), uye achauya kwatiri ari oga (nemabasa ake chete).
81. Uye vanotora vanamwari kunze kwaAllah (sezvinamatwa), kuti vavape rukudzo, nyembe nehukuru (uye vovadzivirira kubva kumurango waAllah).
82. Kwete! (Asi izvo zvanamwari zvimudhori zvacho) zvicharamba kunamatwa kwazvona navo, uye zvichave zvinovapikisa (kureva kuti vanhu vanonamata zvimwe zvinhu zvisiri Allah, zvinhu izvozvo zvichavaramba pazuva rokutongwa).
83. Hauna kuona here kuti takatuma maShayaatween (vanadhiyabhorosi) kune avo vasingatendi (muna Allah) kuti vavasundire mukuita zvakaipa.
84. Naizvozvo usave unovakurumidzira, zvirokwazvo, tiri kuvaverengera verengo (yamazuva eraramo yepasi pano uye tononotsa nguva yavo yokurarama yatakavatarira yokurarama kuti vawedzere kutadza kwavo).
85. Zuva (iro) ratichaunganidza avo vanotya Allah (Al-Muttaqqoon) kune (avo) vane ngoni zhinji (Allah) seWafd (vatumwa kubva pane vamwe).
86. Zvekare tichaendessa maMujrimoon (vaiti vemabasa akaipa, horomori) kuGehena, apo vanenge vaine nyota (semombe dzine nyota dzichienda kunonwa mvura).
87. Hakuna achazove nesimba rekureverera kunze kweuyo akatora (ane) chibvumirano nevane ngoni zhinji (Allah).
88. Uye vanoti: “(Allah) vane Ngoni Zhinji vane mwanakomana (sezvinotaura maJudha kuti Uzair (Ezra) mwana waAllah, uye maKristu vanoti Jesu (Isa) mwana waAllah, uyezve vasingatendi kubva kumaArab vanoti Allah vane vana vasikana (ngirozi nevamwe)).”
89. Zvirokwazvo, mave munounza chinhu chakaipisisa (zvikuru).
90. Apo matenga atova pedo pedo nekubvaruka nenyika yavakutobaduka (kutsemuka), uye makomo avakuda kutowondomoka kuti ave shopa (anoparara).
91. Nekuti vanonemera mwana kuna Ar-Rahmaan (vane Ngoni Zhinji).
92. Uye hazvikodzeri kuti (Allah) vane Ngoni Zhinji vave (vanotora) vanoita mwanakomana (kana vana).
93. Hakuna kana chii zvacho chiri mumatenga nemunyika asi kutoti chinouya kunaAr-Rahmaan (Vane Ngoni Zhinji) semuranda.
94. Zvirokwazvo, (Allah) vanoziva mumwe nemumwe pakati pavo, zvakare (Allah) vave vanonyatsovaverenga verengo (yakazara).
95. Uye mumwe nemumwe wavo achauya pazuva rokumutswa kwavari (Allah) ari oga. (Asina kana mudziviriri kana mubatsiri).
96. Zvirokwazvo, avo vanotenda (muhumwechete hwaAllah) pamwe nemutumwa wavo (Muhammad (SAW)) uye vanoita mabasa akanaka, (Allah) vane Nyasha Zhinji vachave vanovapa rudo (vachaisa rudo mumoyo yeavo vanotenda).
97. Naizvozvo, zvirokwazvo tave tinoita kuti (Qur’aan) rive nyore parurimi rwako (iwe Muhammad (SAW)), uye kuti (uve) unofambisa mashoko anofadza kune avo vanotya Allah (Al-Muttaqoon kuburikidza naro (Qur’aan), uye uve unoyambira kuburikidza naro (Qur’aan) kune vanhu maLudd (vanoita mabasa erima, vasingatombotendi muna Allah, avo vanopikisa mirairo nenhaurwa dzamutumwa Muhammad (SAW)).
98. Zvekare zvizvarwa zvingani zvatakaparadza ivo vasati vavepo? Unokwanisa kuwana (munhu) mumwechete kubva pakati pavo here kana kunzwa kazeve-zeve kubva kwavari (kana kunzwa kazevezeve pamusoro pavo)? |
| | | | | | CHITSAUKO MARYAM | |
|
مواضيع مماثلة | |
|
| | صلاحيات هذا المنتدى: | لاتستطيع الرد على المواضيع في هذا المنتدى
| |
| |
| |
